قاشلارون قبله گاه اولور اولسون

اگری لر روبه راه اولور اولسون

زولفووه آشنا اولان گون ده ن

روزگاریم سیاه اولور اولسون

قتلینه صف چکیب او کیپریک لر

هربیری بیر سپاه اولور اولسون

حسنووون مین چیچک لی باغیندان

قسمتیم بیرجه آه اولور اولسون

فتنه جو ساچلارین وئریب فتنه

فضل ودانش گناه اولور اولسون

(شاهی )ام من ده نکته بین لر تک

شوکتیم اشک و آه اولور اولسون

ایندی کی شهریاریمیزگئتدی

هر گدا هاردا شاه اولور اولسون

           عسگرشاهی اردبیلی

چاغ لار دولوبدی حسرته چاغ دان گیلی لی ام 

حسرت لی چاغ دا  اهنز  ایاغ دان گیلی لی ام

تا ایستیره م دئیه ام , ساچووون سهمی  قویمایر

قومرال    ساچیندا یوخسا  داراغ دان گیلی لی ام

تک  ساچ  دگیل  گیلی لیگیمن    وار  تعـــــددی  

قاش دان قاباغ دان / ال ده ن ایاغ دان گیلی لی ام

بیر  بوسه ده ن  ساری  قانیمی دوتدو  شیشه یه

جانیم دا  چیخسا    قانلی  دوداغ دان   گیلی لی ام

سئودالی سینه ده  غم عشقین  گلیـر گئدیر

من له   قونشمـایان بو  قوناغ دان  گیلی لی ام

مین بیرآلاغ بو  باغدا بیتیب  یوخ  آدین  دوتان

تر لاله نی بیچـن  کوت اوراغ  دان گیلی لی ام

یوخ تاغ دا  بیـر گیله  نئجه  قوت  وئریم  دیله ؟

دونسه ام ده  بولبوله  بئله  تاغ دان گیلی لی ام

چـاتدیم   نگاره    قاره  گونوم  تازه  باشلانیب  

اطرافی  کولگه  لیک لی  چیراغ دان گیلی لی ام

جانیم چیخیر چاغیـر گله قان قارداشیم باجیم 

بالدیزدان اینجیدیم  باجـاناغ دان  گیلی لی ام

کسمز  پیچاغ  قین این  نیه  یار کسدی صبریمی   ؟

( یالقیز ) قین این کسن  بو پیچاغ دان گیلی لی ام

       داودکیانی  - اردبیل  تیرماه  1388

از دکتریوسف معماری علاوه براشعارمختلفی که درجرایدومجلات به چاپ رسیده است یک جلد دیوان در مراثی ومناقب اهل بیت عصمت وطهارت علیهم السلام ویک جلد ترجمه اشعار خیام به زبان ترکی به زیورطبع آراسته گردیده که هر دو نایاب است است.

 بیرغم ده اوره ک داغلامیشیق لاله ده من ده

بیرغنچه ده قان آغلامیشیق ژاله ده من ده

گوم گوی گوگریب زانباقین آرخ  اوسته جمالی

زانباق دا یانیر عشق اودونا لاله ده من ده

ساپ ساری سارالمیش اوزوم آلاله مثالی

بیر دلبره مفتون اولوب آلاله ده من ده

قیپ قیرمزی گول تک قیزاریر اوزده یاناق لار

حسرت له باخیر گول اوزه محتاله ده من ده

گلشن ده چمن یام یاشیل/ افغانیده بولبول

بولبول ده گلیب تنگه داخی ناله ده من ده

آغ آپپاق آی اوسته توکولوب قاپ قارا زولفون

حیرت له باخیر آی اوزوده هاله ده من ده

من (یوسف )عشقم یانیرام عشقین اودوندا

نورس ده یانیر عشق ده صدساله ده من ده