منی ائله آتیب گئتدین
سیندیم سنسیز بو شه هه رده
بوزا دؤندو دویغولاریم
دوندوم سنسیز بو شه هه رده
قار بورودو سؤزلریمی
دومان آلدی گؤزلریمی
سندن قالان ایزلریمی
داندیم سنسیز بو شه هه رده
***
اوره گیمه چئکدین داغئ
قویوب گئتدین آخشام چاغئ
داها سنسیز یاشاماغئ
قاندیم سنسیز بو شه هه رده
***
گونوم اولوب گوندن قارا
هارام واردیر گئدیم هاره ؟!!!
یادا یالوارا-یالوارا
یاندیم سنسیز بو شه هه رده
بو منه درد اولوب اؤلدورور منی
نه دنسه سیغمیرام قوینینا سنین
منده ایسته ییرم بیر مینجیق کیمی
دولاشیب آسیلام بوینینا سنین
ایزین وئر یاناشیم، گه لیم یانینا
بو گئجه ائله بیل سون گئجه میزدیر
بو گئجه قاپی دا قالان گؤزلریم
اؤزونده بوغولان قانلی دنیزدیر
سنه یالواریرام سون باهاردا من
سیخیلیر اوره ییم سیخیلیر آنجاق
قارانلیق گئجه لر سیزلایان کؤنول
سنین اللرینده اولوب اویونجاق
وئر منه گؤزونون قاراسین آغین
قوی سنه یئر سالیم اوره ییم اوسته
سئوه ک عشقیمیزین لاپ کؤرپه چاغین
بو سئوگی یورقوندور - بو سئوگی خسته
قیما گؤزلریندن ایراغا دوشه م
یئر ائله شاختادیر اوشویور جانیم
منده دوداغیندا قالان اؤپوشه م
« آی » بونا شاهیددیر من نه جور دانیم
آچیق قوللاریندا یئریم هاردادیر ؟
نه دنسه سیغمیرام قوینینا سنین
منده ایسته ییرم بیر مینجیق کیمی
دولاشیب آسیلام بوینینا سنین
منیم باشیم آغاریبدیر
یازلیغیما دولو یاغدئ!
ایندی منی مندن آلان
اوره گیمده چؤکن داغدئ
نلر چئکیب منیم باشیم
آغاریبدیر ساچیم ، قاشیم
اینانیرام ، قان قارداشیم
اؤلمه ییبدیر هله ساغدئ
من آغلادیم اودا گولدو
آیریلمیشیق نئچه ایلدی
هئچ بیلمیره م نه نیسگیلدی!!
نه آغریدی نه سایاغدئ!!
آرزیلاریم یورولمایین
اوز ـ گؤزومه سوورولمایین
یانیب – یانیب قوورولمایین
سئوگیلیمه یئته ن چاغدئ
هاوا سویوق گئجه یاری
ایسته میرم یاغان قاری
آداملارین آرزیلاری
یاری قارا یاری آغدئ
سن باتدین دنیزه بیر دنیز کیمی
سندن آیریلالی گوله بیلمیرم
من سئنیق کؤرپوده قالان ایز کیمی
قورتولوب یانینا گه له بیلمیرم
ال – اله ، اوز – اوزه دایاندیق دوردوق
« آی » دا خومار – خومار باخیردی بیزه
کؤرپونون اوستونده بیر نیشان قوردوق
آیریلدیق ، سؤز وئردیک بیر بیریمیزه
